CASTLE LAGER KUWALETA MAKOCHA WA FC BARCELONA NCHINI

Meneja Masoko wa Kampuni ya Bia Tanzania (TBL), Fimbo Butallah (katikati), akizungumza na waandishi wa habari (hawapo pichani), Dar es Salaam jana, kuhusu ujio wa makocha wawili wa Kalabu ya FC Barcelona ya Hispania kwa ajili ya kutoa mafunzo ya siku 2 kwa makocha nchini. Kushoto ni Meneja wa Bia ya Castle Lager, Kabula Nshimo na Meneja Biashara wa Shirikisho la Mpira wa Miguu Tanzania (TFF), Peter Simon.

RAIS JAKAYA KIKWETE AIPONGEZA UJERUMANI KWA KUNYAKUA KOMBE LA DUNIANI

 TAARIFA MAALUMU

RAIS Kikwete ametoa pongezi hizo kwa Balozi mpya wa Shirikisho la Jamhuri ya Ujerumani Mheshimiwa Egon Kochanke ambaye  amewasilisha Hati zake za Utambulisho leo asubuhi Ikulu .

“Naipongeza Ujerumani kwa kuibuka washindi natumaini tutashirikiana vyema katika masuala ya utamaduni hasa hasa katika  kuinua kiwango cha  soka nchini Tanzania na kuzisaidia klabu za Tanzania kuanzisha shule maalum kwa ajili ya mpira wa miguu nchini.” Rais amesema na kuishukuru Ujerumani kwa misaada mbalimbali katika sekta za Maji, Utalii, Usafiri wa majini na maeneo mengine ya maendeleo.

Rais pia amepokea Hati za Mabalozi Richard Stuart Man wa  New Zealand na Bw. Claude Morel wa Ushelisheli ambao wana makazi yao Pretoria, Afrika ya Kusini na Balozi Sander Kocsis wa Hungary mwenye makazi yake Nairobi , Kenya.

Baadae leo mchana, Rais Kikwete amekabidhi Bendera ya Taifa kwa Timu ya Michezo ya Jumuiya ya Madola, inayotarajiwa kufanyika Glasgow kuanzia tarehe 23 Julai hadi tarehe 3 Agasti mwaka huu.

Hafla ya kuiaga Timu hiyo imefanyika katika Uwanja wa Taifa jijini na kuhudhuriwa na Waziri wa Mambo ya Nje, Mhe. Bernard Membe na Naibu waziri, Wizara ya Habari, Vijana, Utamaduni na Michezo Mhe. Juma Nkamia.

Timu ya Tanzania inatarajiwa kuondoka kesho tarehe 16 Julai,2014 kuelekea Scotland ambapo inatarajiwa kushiriki katika Riadha, Ngumi, Mpira wa Meza, Judo, Kuogelea, Baiskeli na Kunyanyua vitu vizito.

Rais amewaambia washiriki waende wakijua kuwa wana deni la kutunza heshima binafsi kama wachezaji na heshima ya Nchi na Taifa kwa ujumla.

“Siri ya mafanikio ni maandalizi mazuri na tumewekeza sana kwenye mafunzo na maandalizi yenu na hivyo safari hii maandalizi yalikuwa mazuri, hivyo mna deni kubwa” Rais amesema.

RAIS JAKAYA KIKWETE AVIPONGEZA VYAMA VINNE VYA SIASA KWA KUANZA MAJADILIANO YA MUAFAKA WA KATIBA MPYA

Na Mwandishi Maalumu

Rais wa Jamhuri ya Muungano wa Tanzania, Mheshimiwa Jakaya Mrisho Kikwete amevipongeza vyama vinne vikuu vya siasa nchini ambavyo vimeanzisha majadiliano ya kutafuta namna wajumbe waliosusia Bunge Maalum la Katiba wanavyoweza kurejea Bungeni.

Aidha, Rais Kikwete amewataka Watanzania kujiepusha na kishawishi cha kuingilia mchakato wa Katiba Mpya kwa maneno na kutoa kauli nyingi, nyingine zikiwa za upotoshaji na uchochezi, jambo ambalo linawanyima utulivu wajumbe wa Bunge Maalum la Katiba.

Rais Kikwete pia amewataka viongozi wa dini kuwaombea wajumbe wa Bunge Maalum la Katiba waliosusia mchakato wa kutafuta Katiba kurudi Bungeni ili kumaliza kazi ya Kutunga Katiba Mpya kama wanavyotarajiwa na Watanzania.

Ili kuhakikisha kuwa kazi hiyo ya Kutunga Katiba Mpya inakamilika bila wajumbe kulazimika kufanya kazi hiyo kwa haraka kupita kiasi, Rais Kikwete ameliongezea Bunge hilo maalum siku 60 za ziada kwa mujibu wa mamlaka ambayo anapewa na Sheria ya Mabadiliko ya Katiba.

Rais Kikwete ameyasema hayo leo, Jumapili, Julai 13, 2014 wakati alipohutubia mamia kwa mamia ya waumini wa Kanisa la Tanzania Assemblies of God (TAG) kwenye Uwanja wa Sokoine mjini Mbeya, katika maadhimisho la Kanisa hilo kutimiza miaka 75 tokea kuanzishwa nchini.

Katika hotuba yake ambako amezungumzia masuala mbali mbali likiwemo lile la Katiba Mpya, Rais Kikwete amewaambia wananchi waliofurika uwanjani humo:

“Bahati nzuri wiki iliyopita, wawakilishi wa vyama vya CCM, CHADEMA,CUF na NCCR-Mageuzi wamekuwa wanakutana kwa jitihada za Msajili wa Vyama vya Siasa. Naambiwa bado wanaendelea na mazungumzo. Napenda kutumia nafasi hii kutoa pongezi za dhati kwa viongozi wa vyama hivyo kwa uamuzi wao  wa kukutana nakutafuta namna ya kusonga mbele. Tunatoa pongezi maalum kwa Msajili wa Vyama vya Siasa, Mheshimiwa Jaji Mutungi kwa kufanya uamuzi mzuri wa kuwakutanisha viongozi hao.”

Ameongeza Rais Kikwete: “Wao ndio walitufikisha hapa na wao ndiyo wenye uwezo wa kutukwamua. Wao wana ufuasi mkubwa miongoni mwa Wajumbe la Bunge Maalum.”

 Amesema Rais Kikwete: “Niwaombe  Watanzania wenzangu tuwape nafasi viongozi wetu wazungumze kwa utulivu. Tuache kwanza maneno maneno yatakayowachanganya. Maana siku hizi wasemaji wamekuwa wengi na kauli zimekuwa nyingi, nyingine zikiwa za upotoshaji na uchochezi . Miluzi mingi humchanganya mbwa.”

Kuhusu nafasi ya viongozi wa dini katika suala zima la baadhi ya watu kususia Bunge Maalum la Katiba, Rais Kikwete amesema: “Ombi langu kwa nyie viongozi wa dini ni kwamba tuwaombee ili warudi kukamilisha kazi tuliyowatuma. Tuwaombee wote wafanye uamuzi wa pamoja. Sote tunataka warudi kukamilisha shughuli kwa sababu mara ya mwisho lililobakia lilikuwa ni kupiga kura tu kuhusu kipengele cha kwanza na cha sita cha Rasimu ya Katiba Mpya.”

Ameongeza: “Tuwaombee wawe na mazungumzo mazuri na yenye mafanikio. Wakubaliane juu ya kuendelea na kukamilisha mchakato katika siku 60 za nyongeza kuanzia Agosti 5, mwaka huu, 2014. Tuombe kwa nguvu zetu zote ili Bwana Mungu awaongezee viongozi hao wapate mwafaka utakaoliwezesha Taifa kupata Katiba nzuri na inayotekelezeka, katiba yenye kuleta umoja, mshikamano na upendo, Katiba itakayodumisha amani na utulivu nchini na kuchohcea maendeleo ya kasi zaidi.”

Akizungumzia masikitiko ya Kanisa la TAG kuhusu kukwama kwa mchakato wa Katiba na rai ya Kanisa hilo kuwataka wajumbe wote wa Bunge Maalum la Katiba kurejea Bungeni, Rais Kikwete amesema:

“Masikitiko yenu ndiyo masikitiko yangu na ndiyo masikitiko ya Watanzania wote. Rai yenu ndiyo rai yangu na ya Watanzania wote. Nafarijika kusikia kuwa nanyi viongozi wa dini mkizisihi pande zote kurejea Bungeni na kumaliza tofauti zao kwa mazungumzo ndani ya Bunge.”

KAMPUNI YA FARM EQUIPMENT (T) LIMITED ILIVYOPAMBA KONGAMANO LA KILIMO MVOMERO

Baadhi ya wakulima waliotembelea banda la Kampuni ya Farm Equip (T) Limited, wakati wa maonesho katika kongamano la mpango wa 'Matokeo Makubwa Sasa BRN' katika kilimo lililofanyika Kijiji chja Mkindo Tuliani mkoani Morogoro juzi, wakiangalia na kusikiliza maelezo kuhusu matumizi ya pambu za kupulizia dawa katika mashamba. Kushoto ni Meneja Mkuu wa kampuni hiyo. Naushad Khan.


Waziri wa Kilimo na Chakula, Mhandisi Christopher Chizza, (kulia juu ya mashine), akifurahi wakati akijaribu kuiendesha mashine ya kisasa ya kuvuna mpunga aina ya Kubota alipotembelea banda la Kampuni ya Farm Equip (T) Limited, wakati wa maonesho katika kongamano la mpango wa 'Matokeo Makubwa Sasa BRN' katika kilimo lililofanyika Kijiji chja Mkindo Tuliani mkoani Morogoro juzi. Chini (Kushoto) ni Meneja Mkuu wa kampuni hiyo. Naushad Khan.

 Baadhi ya wakulima na wakazi wa Mvomero wakiangalia zana za kilimo aina ya Kubota na Sonalika zkatika banda ya la Kampuni ya Farm Equip (T) Limited wakati wa kongamano hilo

Waziri wa Kilimo na Chakula, Mhandisi Christopher Chizza, (katikati), akisikiliza maelezo ya Meneja Mkuu wa Kampuni ya Farm Equip (T) Limited, inayosambaza zana za kilimo nchini, Naushad Khan (kulia), kuhusu matumizi bora ya matrekta ya Kubota na Sonalika yanavyotumika kwa wakulima ili kuunga mkono Mpango wa Matokeo Makubwa Sasa (BRN), Wakati wa Kongamano lililofanyika Kijiji cha Mkindo Mvomero mkoani Morogoro juzi ambapo mikoa minne ilishiriki. Katikati ni Mkurugenzi wa Kampuni ya Ndaki Auto Parts, Iddi Ndaki, ambao ni wasambazaji wa zana hizo mkoani humo.

    Waziri wa Kilimo akiendesha mashine ya kuvuna mazo aina ya Kubota ya Kwenye Banda la Farm Equip (T) Limited

RAIS JAKAYA KIKWETE AIAGIZA HALMASHAURI ZOTE NCHINI KUITENGEA NHC ARDHI

Na Mwandishi Maalumu

Rais Kikwete amerejea Dar-es- Salaam mara baada ya majumuisho.
Rais Jakaya Mrisho Kikwete ameziagiza Halmashauri zote nchini kutenga  ardhi kwa Shirika la Nyumba la Taifa (NHC) kwa ajili ya kujenga nyumba za bei nafuu kote Nchini.

Rais Kikwete ametoa maagizo hayo leo mjini Tanga wakati akifanya majumuisho ya ziara yake katika Mkoa wa Tanga.
Rais amesema nyumba za bei nafuu zikijengwa  zitatoa nafuu na kuondoa tatizo la makazi kwa  wafanyakazi na wananchi wenye nia ya kumiliki nyumba na pia itapendezesha Halmashauri hizo.

Katika ziara yake ya kikazi Mkoani Tanga ambayo imefanyika kwa awamu mbili, Rais ametembelea Wilaya zote za Handeni, Kilindi, Lushoto, Korogwe, Mkinga,  Muheza, Pangani na Tanga.

Rais pia amewataka viongozi kote nchini kusimamia na kuhakikisha kuwa tatizo la watoto kutomaliza shule linasimamiwa na kushughulikiwa ipasavyo kwa sababu huo ndiyo msingi wa maendeleo katika Taifa letu.

"Viongozi lazima kusimamia suala la elimu kwani hapo ndipo tunapowekeza kwa ajili ya hatma ya vizazi vyote" amesema na kuongeza kuwa wasiokuwepo shule watafutwe na wazazi waulizwe walipo watoto hao walioacha shule.

Rais amezitaka Halmashauri zote zikae na kujadili hali ya mahudhurio ya watoto shuleni na kutoa taarifa Serikali Kuu mapema.

Akiwa Mkoani Tanga, Rais amesema Serikali itaendelea kutekeleza ahadi zake na kusimamia zilizoanza ili zikamilike kwa wakati. Kuhusu uchaguzi wa Serikali za Mitaa unaotarajiwa kufanyika baadae mwaka huu, Rais Kikwete amesema hatma yake iko katika matokeo ya maamuzi ya Bunge la Katiba na pia kutegemea aina gani ya serikali itakayopendekezwa, ambapo kama Bunge la Katiba litaamua kuwa na Serikali mbili, uchaguzi unaweza kusogezwa mbele kidogo kwa ajili ya matayarisho na kisha kufanyika, ila kama itaamuliwa kuwa na Serikali tatu, uchaguzi huo utategemea Katiba ya Tanganyika ambayo itabidi  iandikwe kwanza. 

VODACOM YAZINDUA HUDUMA MPYA NA MFUKO WA DHAMANA YA UWEKEZAJI TANZANIA (UTT)

Saimon Migangala wa UTT akizungumza wakati wa uzinduzi huo

Salum Mwalim

Meneja Uhusiano wa Nje wa Vodacom, Salum Mwalim (kushoto), akiwaonesha waandishi wa habari,(hawapo pichani) Dar es Salaam jana,kipeperushi kinachoonesha jinsi ya kutumia huduma ya M-pesa kwa ajili ya kununua vipande vya mifuko ya pamoja iliyo chini ya Dhamana ya Uwekezaji Tanzania (UTT). Kulia ni Ofisa Mwendeshaji Mkuu wa mfuko huo, Simon Migangala.

RAIS JAKAYA KIKWETE AAGIZA MA RC NA MA DC KUJENGA MAABARA KILA SEKONDARI IFIKAPO NOVEMBA MWAKA HUU

Na Mwandishi Maalumu

Rais Jakaya Mrisho Kikwete amewaagiza Wakuu wa Mikoa na Wilaya kote nchini kuhakikisha kuwa wanashirikiana na Wananchi kuhakikisha kuwa ifikapo Mwezi Novemba Mwaka huu,  kila Shule ya Sekondari katika maeneo yao, ina  maabara kwa ajili ya masomo ya Sayansi.

Rais Kikwete amesema hayo Mkoani Tanga katika nyakati tofauti Wilayani Kilindi na Lushoto ambapo yuko katika ziara ya kikazi Mkoani Tanga tangu tarehe 8 Julai hadi tarehe 12 Julai,2014.

"Nataka ifikapo Mwezi Novemba, Mwaka huu vyumba vya maabara viwe vimekamilika, tulipeana miaka miwili, imetimia" Rais amesema na kuongeza kuwa lazima tusahihishe makosa tuliyofanya ya kutojenga maabara wakati tunajenga shule za sekondari nchini kote.

Mwaka 2006, Serikali ilihamasisha ujenzi wa Shule za Sekondari nchini kote na muitikio ni mzuri, lakini hakukuwa na uhamasishaji wa kujenga maabara.  

“Tumeamua kushughulikia suala la maabara ili kuongeza idadi ya wanafunzi wa masomo ya Sayansi kote nchini." Rais amesisitiza.

Rais amesema ameridhika na upanuzi wa Elimu katika ngazi za Msingi na Sekondari kote nchini na Serikali inaendelea na hatua ya kutatua changamoto za ubora wa Elimu, kuongeza Walimu, kuongeza Vitabu, ujenzi wa Maabara na Nyumba za Walimu kote nchini.

Akihutubia katika mkutano wa hadhara Wilayani Lushoto Rais ameahidi kuboresha na kushughulikia suala la ujenzi wa barabara ya kwenda Bumbuli na zaidi kuhakikisha anaweka barabara ya lami katika mji wa Lushoto na mji mdogo wa Bumbuli.

Rais anaendelea na ziara Wilayani Lushoto na Mkinga ambapo anaendelea kuzindua miradi na kukagua miradi ya maendeleo.